سؤال : هل يكره المصريون اسرائيل على طريقة المرحوم شعبان عبد الرحيم ؛ اللي كان بيحب عمرو موسى صاحب عما يتساءلون ؛ أو على طريقة المصريين الحنجوريين: سنلقى باسرائيل فى البحر ؛ وان أمتك ياعربى من المحيط للخليج .. وهلم جرا ؟
جواب: الواقع اننا نعشق اسرائيل ؛ ولكنه ليس عشق الحبيب المتلهف للقاء حبيبته ؛ الذى فرق بينهما البعاد ؛ واكتفيا عوضا عنه .. بقلة النوم والسهاد !
نعشق فيها .. زمن البلطجة الجميل واللى ماتعرفش تاخده بمخك الجميل ؛ تاخده بإيدك يا معلم ؛ وحد له شوق فى حاجة.
أومال .. مش أحنا ملوك الفهلوة !
نعشق فيها روايح إبراهيم الأبيض؛ ودمائه الثائرة فى كل مكان .
نعشق فيها زمن الجزيرة .. ومقولة السقا الشهيرة: من النهاردة مفيش حكومة .. أنا الحكومة !
ونعشق فيها مقولة جدى وجدك : اللى ملوش كبير يشترى له كبير ؛ حتى ولو كان بلطجيا .. ياكل نص العيش؛ ولكنه خبازه!
نعشق فيها الرزالة وسمك الجلد والتناحة والصبرعلى جيرانها السو ؛ لا ربنا ياخدهم لا يرحلوا ؛ لا يسيبوا لينا الجمل بما حمل .. من النهر الى النهر!
نعشق فيها أنها تأكل عيش وكرواسون وكل ما لذ وطاب ؛ على أطلال ضعفنا وتخاذلنا ؛ ولامؤاخذة انبطاحنا فى كثير من الأحوال!
ونعشق فيها أنها مع كل ضربة قفا من هنا أوهناك ؛ بتقوم وتعافر وتناطح على طريقة أغنية بنك مصر الشهيرة: يا معافر؛ أو قفا الفيلم الشهيرعنتر ولبلب؛ أو مقولة الرجل السفيّف فى مسرحية لمحمد صبحى : متقدرش!
ومثله تماما تخرج لنا لسانها؛ وكلما هممنا بردها قالت لنا نفس العبارة: ما تقدرش.
ومن ورائها كافلها وحاميها وتاج رأسها ورأسنا: العم سام !
نعشق اسرائيل ونخبىء عشقنا ؛ ولا نعلم أن العاشق تفضحه عيونه ؛ فما بالك بأعين أكثر من 100 مليون مصرى!
نعشق إسرائيل ونكره أنفسنا؛ ونقول على الشهيد إرهابى أو ذئب منفرد أو أصابته لوثة عقلية؛ أو أنه خارج عن السياق ؛ أو أن فرحتنا به .. نوع من المراهقة الساذجة !
نعم .. نحن نعشق اسرائيل وندارى؛على طريقة العشق الممنوع والمسلسلات التركية لمهند وشركاه.
نعشق فيها القوة وأن القلة تغلب الكترة .. ولا أقول الشجاعة!
نعم أنا وأنت نعشق اسرائيل؛ كل على طريقته ؛ ولعشق اسرائيل (لو تعلمون) مذاهب!
--------------------------
بقلم: خالد حمزة
